Transformaceja

Trolejbusā īraudzieju simpātisku pusaugu puisi. Jis pīsacēle i daguoja da durovu. I isaruodēje, ka tei ir jauna sīvīte palelā gryutnīceibys laikā.

Vīta man blokus

A  man pateik braukt ar trolejbusim, kas īt iz parku Jelgavys īlā. Tī iz parku braucūšī transporta leidzekļi bīži vīn ir taidi kai apdaleiti, jūs maršruts ir cyts, bīži eisuoks, koč bīži i ūtraižuok, i cylvākim nav vairs pa ceļam, cytim mož i bais kuopt īkšā - kas tū lai zyna, kur taids valns var aizvest!

Nu a es kotru darba dīnys reitu stuovu pīturā Luočplieša īlys tuolajā golā pi Solu tylta i gaidu, kas tod mani vess puori upei - 19., 24. voi tī iz parku Jelgavys īlā. A iz parku te īt taidi numeri: 14, 17, 19, 23, 24. Mož i vēl kaids, kū napīminu.

Tī iz parku izreiz aiz tylta grīž pa labi i kaidu gabaleņu brauc gar kanalu, i jim ir pītura "Bieķensalas iela" - a tyvuokys pīturys munam dorbam niomz ari nav. Tei ir vīna līta, deļ kam man itī parka braucieji pateik. Ūtra līta - jimūs vīnmār ir cīši daudz breivys vītys. Ir bejuši gadīni, ka asom treis cylvāki pa vysu trolejbusu - vadeituoju īskaitūt. Tod es varu apsasēst, kur na īīt pruotā. I nav ni iz vīnu juoblenž pīspīdu kuortā voi juoisalīk, ka naradzu, ka blenž iz mani. Voi, kai ir tod, kod pavysam asu pīkususe, juonūlaiž skatīns greidā, kamer nu ituos acu pozicejis izīt snaudīns.

A šudin brauču ar 17. Vaca grabaža beja tei mašyna. I grabaža tīšā nūzeimē, jo grabēje kai troks. Vairs taidu nav cīši daudz iz Reigys īlom palics, juoizbauda, kamer vēl ir. Cylvāku beja padaudz deļ ituo specifiskuo maršruta, no itī padaudz taipat napīpildeja ni pīktū daļu nu trolejbusa. I tod atsavalk sīvīte rozā žaketē i apsasāst man blokus. Ak tu mygla! Tev vītys tryukst? Voi cylvāka syltuma?

Laikam jei sajuta, ka man napateik dalēt itū pašaurū benči ar svešu cylvāku kod apleik breivys vītys kai dubļu, voi ari jai pošai tū nasagribēje, a mož jei pi manis pīsēde pīspīdu kuortā, kod trolejbuss strauji īsuocūt braukt jū nūgryude nu kuojom. Lai tī kai, jei mudri puorsasēde vīnu ryndu iz prīksu. I paldis Dīvam. Nito es sovā pruotā kai mozūs iergļu cuoļs suoktu knuobuoti tū, kas atsavylka tī, kur es jau beju da tam.

Vestiena i Lazdona

Izbraucem ar Valdi vakar nalelu leikumeņu ar mašynu. Dabraucem da Vesteinai apsavērt, voi metāla panduss nav jau izlykts pi školys īejis. Škola Vestienā - bejušuo muiža i arhitekturys pīmineklis. A pandusa ideja pīder man, tikai margu dizains gon nav muns, i konstrukcejis ar na es riekinuoju. :) I kū? Ir panduss! Vēl gon nav da gola sakuortuots. Nu nazynu, man jau teiri labi patyka. Dūmoju, bārnim ari tī patiks pa jū skraidēt! :D

Vizualizaceja i realizaceja:

Tik juonem vārā, ka fotoaparatam itymā gadīnī nav tik plots lenkis kai 3DSMax! ;)

Peic Vestienas Valdis vede mani iz Lazdonu paruodēt kaidu jūceigu muoju ar tūrneiti. Tei āka beja kaidā vysā vysumā pamastā teritorejā, kū pasorgoj suņi. Nu es nu aiz žūga i bildieju.

A tod nu tyvejuos teisstuovu industrial sātys pa lūgu izakuore nazkaids vecs i suoka bļaut iz myusim, kū mes te fotografejom i tai. A Valdis jam soka - bet nav tok aizlīgts! Asūt gon aizlīgts! A iz kaida pamata? Šys tai sokūt! Nu i pašol dierst! Atsarads lykuma dikteituojs. Bet par laimi mes jau kaireiz braucem prūm i nabeja juosakosuos tuoļuok ar itū "aizlīdzieju". Tfu, cik tī cylvāki mādz byut i baileigi i nauzticeigi, i kotrā mirklī gotovi sovu nūžālojamū varu izruodēt. Leidzeigi kai tod, kod zvanieju iz vīnu "Gūteņu" ražūtni šū tū nūskaidruot, bet pretī dabuoju faktiski tikai izsmīklu i izvaireibu daže pošūs prostuokajūs jautuojumūs. 

Naatbildeišonys slimeiba

Nabeidzu breinētīs, kai cylvāki, daže izgleituoti, naadbild iz jim adresātom viestulem. I es že draugiem.lv radzu, ka ir izlasiejuši. I na jau kū naz kū man vajag, prosu, voi nav koč kas deļ munys kolekcejis. I na jau iz dullū tū rokstu, bet gon cylvākim, kas tykuši internetā ar rokstim par jūs kolekcejom. A jī daže nauzskota par vajadzeigu pascēt "nā, man nav" voi "nā, es nikuo nadūšu". Prosta naatbild. :(

Rodūšuos mūkys

Asu tupikā, Ilona īdeve mozu darbeņu - sataisēt kaidai zuodžu firmai bilžu kolāžai fonu. A man tak tuos bilžu kolāžys vyspuor kai zūbu suoipis, ja vīn nav deļ sevis, tod cyta dzela. Nu i mūkūs tagad, i nikas naīt pruotā! Atguodynoj laikus CSP, kur beja juotaisa gruomotu vuoki makro ekonomikai i tamleidzeigom temom, i nikas lobs naguoja pruotā, i mūciejūs, i koč kaidu krāmu beiguous sataisieju, kas pošai nimoz i napatyka. Tagad draud tys pats! Ehhhh...

Vīna nu versejom :)

A vakar pyrmū reizi itymā sezonā iz ritinim ar Valdi braucem. Beja jau forši!

Žālobys

Nu vot i nazkaids namīrs man ir uzbrucs. Voi tys nu pavasara, voi par ilgi jau sātā siežu, nazynu. Koč kaidu virzeibu voi jautreibu gribīs. Bejom Reigā iz Edmunda dzimšonys dīnu. It kai nikuo tiada sevišķa, bet izreiz cyta sajyuta, ir par kū pasasmīt, ir ar kū i par kū parunuot.

Reigā es izreiz jyutūs pamaneita, nūvierteita, pīvilceiga, ospruoteiga. A te, neikstu lānā gorā. Ni man te darēt ir kū, ni ari gribīs kuo.

Malns mersedess

Vakar kaimiņš taids cīši prīceigs aicynuo mani vyzynuotīs. Vyss jūks ir tymā, ka jam pīder apbeideišonys birojs, i piedejā laikā jis pasuocs iz sātu braukt ar malnu mersedesu... nui, ar katafalku! :D