Peldūšuos solys

Taisieju tikū deļ Valda "peldūšuos solys". Tī juosakuļ ūlu boltumi ar cukru i juoapplaucej verdūšā pīnā - tuos byutu solys, bet nu dzaltanumim taisa vanilis mērci, kurā tuos solys peldynuot. Losu internetā komentarus - daudzim tuos ir breineiguokuos bierneibys atminis, dažim - leluokīs mūrgs. Es pagaršuoju kaidu krikseiti nu tom solom - soldons, pīnā pavuoreits ūlys boltums. Fu. Bet Valdis ir nu tim, kam ar itū iedīni saistuos saulainys atminis, man pošai nav nikaidu. Mama myusim nataisēje peldūšuos solys. Nazynu, deļ kam tai, bet nasajiyutūs apdaleita. Mama myusim taisēje sieņu mērci rudinī i pa svātkim "Vacreigai" leidzeigūs gulbeišus - plauceituo meikle ar kremu īkšā, i atseviški nu meiklis izcapti izlīkti gulbju kakleni, kū peic tam īspraude vajadzeigajā vītā. Voi calmu - tortis maizi apsmērēje ar kremu nu vīnys pusis i sarullēje kai calmu ar goda rinčim, pastatēje iz suona, nu molom nūzīde ar kremu i saspraude vēl calminis - speciali nu meiklis izcaptys sientenis. Vot beja laiki. Gondreiž par vysu, kū mama taisēje, beja prīks. Tik na par oknom, tuos cīst navarieju. I tagad nacīšu. Ja nu vīneigi pastēti - tei gon man pateik.

Valdis vēl nav sātā nu dorba. "Peldūšuos solys" jū gaida. Mož patiks? Ja mama bierniebā byutu taisiejuse, ak jau i man patyktu.

***

Nu vot i pagaršuoja Valdis "peldūšuos solys", i naasūt eisti tys. Nu kaņešna, tai kai mamai jau nasaīs nikod. Naz voi atlykums nabyus miskastē juoizmat?

Suņi psihopāti

Šudin svātdine.

Valdis vakar zvanēje vīnam pasnīdziejam konsultētīs par tyvojūšūs eksamenu, tys ir - par juo puorlikšonu, tys sacēje puorzvanēt vāluok, bet, kod Valdis puorzvanēje, tī nazkaids mozs bārns atbildēje, a pasnīdzieja ni minis.

***

Bejom pi Valda tāva, kas ar sirdi guļ slimneicā. Naveikla situaceja, nazynu, kū jam sacēt, iz palatys greidys kiust snīgs nu myusu zuoboku protektorim i atstuoj nateirys iudiņa pļančkenis. Valdis tože ar nikaidu ģeimi siež. Paklusejom, kaids kū pasoka. Valda tāvam gryuts runuot, dikceja naskaidra, nasaprūtu da gola, kū jis soka. Aizruoda par pīcyukuotū greidu. Es mieginoju pasmaidēt. Vot valns.

Peic tam braucom braukšonys piec. Dabraucom da Cesvainei, aizvadom vīnu stopietuoju pa ceļam. Cesvainē "Kuilī" izādom pa frikadeļu zupys bļūdeņai. Man pusporceja, Valdim vasala. Man korsta, Valdim sylta. Nu tai, ēst var. Tod braucom pa lauku celim, tī vēl lads i blīteits snīgs iz braucamuos dalis, ni tai kai iz šosejis, kur vyss jau teirs i sauss. Vīnā vīta, meklejūt vilcīņa staceju, raugom apsagrīzt i mašyna suok sleidēt, drusku šyupojās iz vītys, bet izkustēt navar - skrytuļi lada deļ īt iz rinči. Es kuopu uorā i stumu, i izsumu. Vyss labi, varom braukt.

Cytā vītā ceļš taipat bolts, i apkuort lauki bolti, te kolnā, te lejā. Augšā braucūt bais, ka nasuok sleidēt i napalīkom pusceļā, lejā braucūt - ka nasuok sleidēt i nasanas myus škārsom. Bet nikas taids nanūteik, tik piedejā breidī navar mainēt trajektoreju - vīnā krustuojumā Valdis piekšni izdūmoj raut kolnā pa kreisi, bet mašyna tik sleid, i mes aizbraucom tūmār taisni. A tī vysbaismieguokais dīnys pīdzeivuojums - divi psihi vylku sugys suņi pa vaļai skrīn rākdami iz myusu mašynu, daže sytās jai gar durovom ar sovim suonim i tik rāc, tik rāc. Vīnam nu jim ruodīs daže purns beja asnī - na nu myusu mašynys, jau da tam. A ceļš palīk tik šauruoks, soku Valdim, mož juogrīž rinčī, jo tī prīkšā tik laikam vīna sāta palykuse i tod ceļam gols. Labi, bet vīta nav cīši ārta aspagrīzt i tī vuojpruoteigī suņi skraida ap mašynu. Jei bogu, taidus vajadzātu dašaut i saimnīku iz psihušku nūsyutēt, itī tok kaidu nabagu, kas nikuo ļauna nadūmuodams ite īsamaldeitūs kuojom voi iz ritiņa saplāstu gobolūs. I kas jūs taidus bezbožna agresivus ir audzynuojs i deļ kam? Suokom grīztīs, i es tik lyudzu Dīvu, lai nasuokom sleidēt i napalīkom iz vītys, jo te jau suņu deļ nu mašynys izkuopt navarēs. Bet drusku iz prīkšu, tod atakaļ, otkon iz prīkšu, otkon atpakaļ i Dīva laime tūmār apsagrīžom bez līkom problemom i braucom atpakaļ. Suņi nasās myusim pakaļ i jūs suoni byukš gar mašynys durovom. Preteigi preteigi preteigi.

Nā nā

Saulispuču sieklenis i veins kūpā naīt. Tys nu ir fakts.

Augstuokuo ģeodezeja

Bļaha muha, nikas vēl nav beidzīs! Bet tys vēl ir labi.

:(

Jyutūs brīsmeigi, it kai kryutīs byutu īdzeita nogla. Valda eksamenu rezultāts vēl aizvīn nav zynoms, bet ir reāls drauds, ka jis zaudēs sertifikatu i kū tod - byus parosts struodnīks? I tikai sova slinkuma i vīglpruoteibys deļ, jau seņ zynuoja, ka byus juopuorlīk, a nā, blenze serialus caurim vokorim. Sacieju - pīzvoni cylvākim, kas zyna, paprosi atbildi iz jauotuojumim, kam atbildi internetā navarējem atrast. Nā, šys nazvanēs. Redzi, navar sovam lapnumam voi kautreibai puorkuopt puori, lai saglobuotu sovu sertifikatu. Tod jau lobuok īs nakavalificeitā dorbā. Tfu.

Jaunova Mareja stuovi man kluot

Šudin desmitūs Valdis Reigā lyka eksamenu, a es skaitieju rūžukrūni. Rezultati vēl nav zyonmi, bet tycamuok, ka Jaunova Mareja izlyka meikstū iz munom lyugšonom i Valdža byus izkrits. :)

Bet nu a kū lai dora. Cerams ļaus puorlikt i cerams ar ūtrū reizi saīs. Ja byus tei ūtruo reize. A ka nabyus, tod i pofig, sertifikats viejā, bet tūtīs ceļš prūm nu namīleituos Modūnis vaļā! Eh, dažreiz īspiejis atīt zaudiejuma izskotā. Bet ja Valdis tūmār byus nūlics, tei byus taida haļava, ka es smīšūs vysu dīnu.

I vēl, beju bezdarbnīkūs, i nikas nabeja juomaloj, jo man nikuo naprasēje. Pagarynuoja tik munu bezdarbnīka bušonu i vyss. Laikam itymūs laikūs atrast specifisku dorbu mozpilsātā ir utopeja, deļ tam nivīns nikuo i naprosa.

Bezdarbnīce

Reit īšu iz bezdarbnīkim nūklusēt, kai da šam niakida dorba naasu mekliejuse.

Varbyuteibys teoreja

O jetu jetu, pyrmūdin byus juolyudz Dīvs par Valdi, deļ tam, ka jam eksāmens sertifikata pagarynuošonai, bet eksāmena jautuojumi - murgs. Tik daudz nazynomu lītu. Es cenšūs paleidzēt, kai muoceidama. Pa šudindīnu kaids gaismys stors byus isalauzs munuos smadzinēs par tēmu disperseja, matematiskuo cereiba, standartnūvirze i cyti. Taipat man vēl juonūskaidroj, kas ir kovariāceja. Rūkūs pa internetu pusi dīnys. Vēl i Valdim juopaskaidroj, kū asu atkūduse.

Eh. A man bais. Par Valdi i juo dorbu. Koč nu vyss beigtūs veiksmiegi!

Telefona numers

Šudin sovā bejušajā dorba vītā turpynuoju kuortuot jūs sātys lopu. Izlīku austenis i klausūs myzyku nu YouTube.com, dīmžāl iz uotru rūku parosti nikas daudz naīt pruotā, tikai tuos dažys dzīsmys, kas vīnmār: Song to Siren Planta, Baklija voi Mortal Coil izpildiejumā, The Verve Bittersweet Symphony, koč kas nu Sigur Ros, Queen Bohemian Rapsody,  Puču duets nu Delība operys Lakme nu i tai tuoļuok.

Šudin sovu dorba dīnu izrūtuoju pa lelam ar Eels i Baluožu pilni pagalmi skaņdorbim. Īdzieru vītejū kopeju, drusku parunuoju ar cylvākim, bet tai pavysam drusku. A uorā saule i sols.

Vakar Aivars L., jauneibys dīnu pusļūbesteiba, izrakstēje viestli draugiem.lv i prasēje, kaids laiks Modūnē i munu  telefona numuru, taisūtīs šudin iz šejīni braukt. Nu na da manis, kaņešna. Pyrmajā viestulē pīrakstieju vysu, kai ir, nūspīžu pūgu 'syutēt', bet pulkstinteņš tik grīžās, bet viestule naīt prūm. Pasakuore virtuālajā gaisā. Rokstu ūtru, bet dūmoju - mož pyrmuo naaizguoja, deļ tam, ka nagribieju eisti tū numeri dūt, pa lelam aiz slinkuma komunicēt ar seņ naradzātu cylvāku, kas praseitu pīpyuli ībraukt juo tagadejā komunikaceis stilā, pa daļai ari aiz bailis nu naārtom pauzem i jautuojumim, kūpeigu interešu tryukuma. Bez tam iz sātu sovā bardakā saukt ari nagrybātu, a ja nu jis uzaprosuos? Byutu juosyuta dillēs. Nu i ūtrā viestulē sovu numeri nanūruodieju, tei aizguoja izreiz da adresata. I kū dūmoj, šis ar mozu smīkleņu prosa, voi ta telefona nadūšūt? Nu labi, ka jau tai, tod ar trešū pīguojīni syutu gon. Bet itei vylcynuošonuos mož jam i radēje nūjausmu, ka es te siežu kai baka i man nav uzniemeibys meklēt kūpdzīsmu ar laika gaitā par svešinīkim palykušim cylvākim. Koč ak jau byutu dereigi i veseleigi. A ka nā, tos atsvaidzynūši 100 punkti.

Kuņģa lītys

Valdis ir čyusku rejiejs
Teiksmainais
Jis šudin kobru nūreja
Kai ūgu
Jei īguo jam kuņģī ar golvu pa prīkšu
I paruodē gastroduodenopāteju
Tik ka kaids byutu zynuojs
kas tys par zvāru
Bet dakters soka:
Dzeivuos!
Nav tik troki
I tuoļuok rit vyss sovu gaitu
Jau garšeiguo veitynuotuo dasa
Stuov iz golda
Vairs cytom nav pīkrišonys nu Valda
I mamys syvāna karbonade
Lānom atsalaiž iz palūdzis
Byus voi juopacap kaida škēle
I juopīkūž lūks

Šlāgerī

Pa ilgim laikim obi ar Valdeiti dasavylkom da Šlāgera koč kū garšeigu apēst. Es nabeju originala i pasyutieju korstūs tītara salatus ar angļu sinepem. Baigi garšoj, i samārā vīgls iedīns. Valdis taipat ar originalitati naspeidēja  i panēme vystu kīnīšu gaumē. Nu kū lai soka, vaca ļubesteiba naryus. A uorā solts, es daže aizsieju sovai capureitei šņūris. Jau vokors i patymss, laternys dag, es pa rūku golam ķeru kadrus ar sovu aparatu, Valdis pa tū laiku nu soltuma sakumps, kapuci iz acim izvilcs i fiksi kuotoj kolnā iz sātys pusi. Es tik paskrīnu jam pakaļ, tod pafotografeju, paskrīnu i otkon pafotografeju; i saktreit tai, ka tik, cik Valdis iz mani atsaver, tik es stuovu iz vītys i fotografeju, bet vysu laiku vīnā i tymā pošā attuolumā aiz juo. Fantastika. :D

Vēl es šudin apzvanieju šaidus taidus cylvākus i īvuoču informaceju par "Gūteņu" ražuošonu Liezērē. Moš iz prīkšu byus vēl šys tys juoīvuoc - tai sacēt, viesture nu cylvāku mutem.

Anglejā i slyms

Vysa dīna pa sātu, i temperatura nadaudz, ap 37 grūzuos. Muoseicys meitu sastdin nūkristējem glauni, Valdis gon gulēje sātā. Mes ar Mairu nūrunuojam, ka myusim labi - ja kaids kū prosa par myusu veirīšim - Mairai Anglejā a muns - slyms. I punkts. A divejom cytom muosom gryutuok - tom veiri šmucis taisa, īdzer par daudz, mašynā īkšā i pazyud naz kur iz ilguoku laiceņu voi suok bļaustētīs i cytom dāmom kanti sist. Fu.

Nu a par Valda dorbabīdru braucīni iz Stokholmu ar prāmi dzierdieju, ka asūt vysu ceļu dzāruši - pa vysim 10 litrus šņaba lykuši cauri, pilsātu nicik nav redziejuši, a tī tok solts kai i pi myusim, i palāks tagad. Jezu, cik labi, ka es tī nabeju, byutu izbeseita, nūguruse i dusmeiga. Es tai dūmoju. I daudz dzert es vairs navaru, nav ni tuos veseleibys, ni gribeišonys cīst paģirys ūtrā dīnā, kod drebuli krota, i naloba dūša i morāluos paģirys - vysbrīsmieguokuos.

A vakar beja Valentīndīna. Atguoja da myusu cīmā Andris. Nabags ap jaunū godu otkon beja psihenē tics iz mienesi. Tys pats vacīs jūks - vyss suocās ar bezmīgu. Tagad taids drusku jūceigs, i pats tū saprūt. A kū lai dora, kotram sovs krysts, dažreiz grybādams nazyni, kai cylvākam paleidzēt. Nu tod mes izguojem pastaigā pa pilsātu, daguojam da Maximys, es Valdim nūpierku tymsi sorkonu rūzeiti pa 55 santimi, vysu mīleituoju dīnā. Kai nikai muns meilais rupucs. I kū, rupucs vokorā izleida nu sātys peic vairuoku dīnu slymuošonus, daguoja da tyvejuo veikala, nūpierka pīnu, a kaidu mozu duovaneņu man svātkūs i napadūmuoja nūpierkt. Atguoja sātā, es jau cereigi gaidu, i nikuo. Man palyka tik abidna, bet es jau jū pazeistu, varieju gaidēt, ka aizmierss i napadūmuos. Peic breiža jis prosa, kū es narunoju ni vuorda, a es i soku - par tū, ka es svātkūs otkon palykuse naīvāruota i naapsveikta. Tys ari palyka skumeigs i kluss, taids kai vaineigs nadaudz. Bet peic kaidys stundeitis jau suokom runuot normali, a kū cytu. Tai mes te dzeivojom.

Nakts kastē

Ka tevi mygla!

Šūnakt švaki gulieju, sajyuta kai kastē. Gulieju iz divana pi Mairys vacuoku sātys ūtrajā stuovā, a divans ta par eisu, i nav vairs izvalkams kai kādreiz, kuoti atsadūre pret divana rūkys bolstu.

Nu i nazkū mūrguoju, namīreigs pruots beja, tū laikam man īdvese vīna puorraide par cylvāku, kas šovā pīkrits atbildēt iz jautuojumim, byudams pīslāgts pi malu detektora. Na jis pyrmīs na piedejīs, bet nu ituo nazkaidu pedofilu taisēje, tai i nabeja skaidrs, beja jis voi nā. I školuotuojs. Man tei puorraide tik preteiga lykuos, fu.

Nu i tai lītuvāna mūceita ap četrim pasamūdūs, kai pa sapnim aizguoju iz ateju, i jiutu, ka nav labi, smadzinis īstrāgušys nazkaidā naveseleigā aktivitātē. Tai i gulieju sovā kastē i raudzieju nūmīrynuot satrokuojušūs pruotu. Paspiejieju tupu spēleiti sovā mobilā. Nūsamīrynuoju. Aizmygu.

Grauds

Eh. Cerams malnboltuos bildis nu kristeibom ar 1600 ISO byus normalys. :)

Ja nav cilvēks paēdis, tad ir cilvēks saslimis

Kod muns veirīts otkon atsasacēje nu puortykys, saprotu, ka juogluob, ni to nabyus labi. Suoku jam pīduovuot vysaidys garšeigys lītys - nu sovys pīredzis, ka slymojūt man personeigi vysvīgluok īēst bīzpīnu, saldiejumu, augļus. I kū dūmoj - itū vysu jis ir ar mīru ēst! Ha hā, nu tik juoīt iz veikalu. 

Uorā snīgs i putins, bet na cīši solts. Es sovā papluonajā sorkonajā mieteleitī izskaraidieju vysu, kū vajag, bez problemom. Pa prīkšu daskrieju da posta, nikuo jauna deļ munys "Gūteņu" kolekcejis atguojs nabeja, tod daguoju da RIMI, sapierku bīzpīna sīreņus i apelsinus/mandarinus, tod apmeklieju puors rūtaļlītu veikalus, bet nikuo jiedziega reitdīnys kristeibom naatrodu - deļ tam reit nu reita pyrms autobusa 9:05 īšu iz RIMI i pierkšu, kas nu byus. Kū lai dora. Peic rūtaļlītu veikalim īskrieju mozajā Maximā nūpierkt munys īcīeituos "Бабкины семечки", tī redzieju foršū daktereiti, kas man taisēje ultrasonogrāfeju vairūgdzīdzeram. Nazynu, mož nimoz tik foršs jis i nav, bet pa gobolu man pateik. Peic Maximys nūguoju gar myusu daudzstuoveni i iz Bafu, jo tī man beja juoīpierk sulys i mineralka - i deļ tam Bafā, ka jis tyvuok sātai, lai mozuok juostīp, kai zynoms, itaids šķidrums ir smogs kai eļne. Nu i tai, kod tyku da sātys, muns veirīts jau siež pi datora. 

Nda, a tagad mes vērsimēs 1967.goda filmu "Andromedys migluojs", kurā spieliejuse poša Vija Artmane. Nā, nu man ta pofig gar jū, bet tūmār latvīte!

A vot itai šūnakt isavēre dzeivūkļa grīsti!

Vairūgdzīdzers i Stokholma

Beju šudin pi daktereitis, ašņa analizis asūt lobys, holesterins lobs, i cukrs labi, i vairūgdzīdera darbeiba pareiza, tik nazkaidys antivīlys uzruoda hronisku vairūgdzīdzera īkaisumu. I deļ tam man asūt kotru godu juopuorbauda vairūgdzīdzera ruodeituoji, lai radzātu, voi nav kaidys izmainis juo darbeibā.

Mamai tys hrena vairūgdzīdzes ari šmuci taisa, ehh. Mož i man tys prīkšā? A mož i nā. Bet sovaižuok, vysi lobi cylvāki, deļ tam, ka lely dzāruoji!

Bez tam Valdis vakar saslyma i mes nateikom reit iz prāmi. Beja paradzāts braucīns iz Stokholmu iz vīnu dīnu ar Valda dorbabīdrim, bet man nimoz i nasagribējēs, deļ tam tagad naasu biedeiga, daže prīceiga, jo tikšu iz Ritys i Kaspara meitenis kristeibom, kas sovaiž ītu man secen. Vot kai ar mani - rodu saīts mani vairuok interesej kai Stokholma.

Bet zīma tok! Gon jau tei pilsāta solta, palāka i preteiga tagad. Brrr. Tik Valda žāl, jam tagad gryurts, vīruss kaulus lauž.

Paaugstynuota temperatura

Valdim paaugstynuota temperatura! Bet ja nu gripa? Pareit paradzāts ar prāmi braukt iz Stokholmu! Kai nu tagad byus?

Muna izlase

Ha ha, smīkleigi - šudis nūfotogrfieju laternys, snīgāi viejā, pošai baigi patyka, až sirdi saviļņuoja. Īlyku tuos bildis projektā 365, i ari albumā draugiem.lv, i ari feisbukā, a reakcejis nu cylvākim nikaidys... vysmoz pagaidom. bet tai goduos vysai bīži, kod es poša prīceiga, bet cyti tī nikuo naredz. Man dinamika, cytim smieriejums! :D

Vot i skumt daže nav eisti par kū, jū ja pošam pateik, značit ir labi. Kamer nasuok ar tū naudu pelnēt.

Nu i nav jau ari tikai tai, ka es vīneiguo, vīmār atsarūna pa kaidam, kam ari cīši pateik. Iz vīna viļņa tai sacēt.

Raugu mūstīs

Tikkū pīsacieļūs i jau nikuo nasargibīs. Oi.

Juonūskoloj stratēgiskuos ķermeņa dalis, juoizkuop iz svorim, juoizvuora iudins čajai, koč kas juoīād, juoīdzer Mildronāts i juosataisa C projektim jaunuos strukturys attāls. Valde, projektātuoji, tiri piri. I tos juodasavalk da kantoram.

Vakar drusku veina īdzieru i ap divim gulēt aizguoju. Tagad raugu mūstīs.

3 Ls stundē

Šudin man pīzvanēje nu bejušuos dorba vītys i pasauce sakuortuot sātys lopu, kuru poša ari taisieju godys četrus atpakaļ.

Te jei ir: http://www.cprojekti.lv/index.html

Runoj, ka asūt teiri simpatiska, nazkam ruodīs par tymsu, bet veiduota nu HTML kīgeleišim Notepadā, bez vilteibom.

Vīnuojūs par 3 Ls stundē. Jī gryb i krīvu volūdu tože. Soka, Leokadija tulkuos. Nu nu.

Da šam sevi ar vēl nabeju nu sātys lopys sarokstim iznāmuse uorā. Nu kuo, nu šudindīnys muna vuorda tī vairs nav.

Voi asu iz jim apsavainuojuse? Mož i asu, nadaudz. Kod atlaide, sacēje, lai esju gostūs, tok man beja skaidrs, ka nikur es naīšu. A kū man tī darēt? Asūšu draugu man tī nav, a pi bejušajim kolēgim īt, tys na deļ manis. Puorīts etaps.

A tagad darbeņš, i varu parunuot ar jim, cik lustis. Prosa kū doru, a es soku, ka ogūrči rulleju, i tei ir taisneiba. Kū doru? Gūtenis kolekcioneju! Grybu prūm nu ituos pilsātys.

Kusti, ķēveit!

Piedejā laikā nasagribīs ni rakstēt ni fotografēt.

Iveta īpyna mani nazkaidā projektā. Nu labi, na nazkaidā, jis nūzasauc Project 365. Nui, gods. Vasals gods, i kotru dīnu pa bildei. Es verūs, ka cyti cylvāki drusku šmaucās i līk bildis nu cytim datumim, es tok cenšūs, lai ir precizi. Kai dīna, tai bilde. A nasagribīs! Jei bogu, ni druskys. Puors kadrus, ka tik byutu, i tai kotru dīnu, ar mozim iznāmumim, jo reizem ir ari grams īdvasmys.

27. janvars, Saulainais snīgs

Bet labi, lai ir tai. Koč i man pošai napateik, i cylvāki ar na seviški, bet zynoma disciplina tei ir. Taidi mozi, tizli ikdīnys vingrynuojumi.

http://365project.org/santa_u/365

I tai pat i ite. Muns projekts, rokstu kotru dīnu. Gribi nagribi.